Gjykata ka dënuar me një vit burgim me kusht Muhamet Musliun, i cili akuzohej nga Prokuroria Speciale për nxitje të përçarjes dhe mosdurimit mes grupeve fetare.
Musliu ka pranuar fajësinë dhe ka lidhur marrëveshje për pranimin e saj me Prokurorinë Speciale. Ai akuzohej se përmes rrjetit social Facebook ka shpërndarë narrativa ekstremiste, përfshirë edhe ato të ngjashme me propagandën e ISIS-it, duke bërë thirrje për dhunë ndaj hebrenjve dhe të krishterëve.
Në seancën gjyqësore, prokurorja Fikrije Fejzullahu propozoi që Musliu të dënohej me një vit burgim me kusht, nëse nuk kryen vepër tjetër penale. Edhe avokati i tij, Visar Rrecaj, e mbështeti marrëveshjen, duke kërkuar ndërprerjen e paraburgimit, pasi – sipas tij – nuk ekzistonin më kushte ligjore për mbajtjen e Musliut në paraburgim.
Gjyqtari Vesel Ismaili e aprovoi marrëveshjen, duke theksuar se janë plotësuar kriteret ligjore të parashikuara nga Kodi i Procedurës Penale.
Ndërkohë, më 14 gusht Prokuroria Speciale kishte njoftuar për arrestimin e Musliut dhe të një personi tjetër me inicialet A.B. Të dy akuzohen se kanë nxitur dhe përhapur urrejtje mes grupeve fetare, duke propaganduar ideologji ekstremiste.
Sipas aktakuzës, A.B. nga viti 2019 deri më 22 maj 2025, përmes profilit të tij në Facebook me emrin “Ubejdullah Abu Suhejla”, ka shpërndarë materiale me përmbajtje nxitëse, duke bërë thirrje për respektim të ligjeve të Sheriatit, kundërshtim të sistemit demokratik dhe bashkim me luftën për xhihad.
