Ministria e Punëve të Brendshme, në bashkëpunim me Policinë e Kosovës, ka nisur dhe po vazhdon një fushatë informuese për zbatimin e Ligjit për të Huajt dhe Ligjit për Automjete, me qëllim të informimit dhe vetëdijesimit të qytetarëve.
Sipas MPB-së, fushata po realizohet përmes shpërndarjes së broshurave informuese dhe po zhvillohet në të gjitha pikat kufitare të Republikës së Kosovës, si dhe në Aeroportin Ndërkombëtar të Prishtinës “Adem Jashari”.
Qëllimi i kësaj fushate është informimi i qytetarëve për procedurat ligjore të hyrjes, qëndrimit dhe punësimit në Kosovë, si dhe për rregullat dhe obligimet që lidhen me drejtimin dhe qarkullimin e automjeteve në territorin e vendit.
Ministria bën të ditur se fushata do të vazhdojë deri më 15 mars 2026, duke synuar lehtësimin e qasjes në informata dhe respektimin e legjislacionit në fuqi.
MPB ka falënderuar Policinë e Kosovës dhe zyrtarët e angazhuar për profesionalizmin e treguar gjatë realizimit të fushatës, si dhe qytetarët për bashkëpunimin e tyre, duke u uruar mirëseardhje dhe qëndrim të këndshëm në Republikën e Kosovës.
