Institutin e Kosovës për Drejtësi ka bërë të ditur se 99 mijë e 407 lëndë civile kanë mbetur të pazgjidhura gjatë vitit 2022 në Kosovë. Hulumtuesit e këtij instituti kanë prezantuar raportin “Drejtësia civile 2022”. Sipas tyre, rritja numrit të lëndëve të pazgjidhura i ka kontribuuar edhe mosefikasiteti i gjykatësve dhe shpërndarja jo-proporcionale e tyre.
Gjatë prezantimit të raportit ‘‘Drejtësia Civile 2022’’ ka theksuar se numri i lëndëve të pazgjidhura në fushën civile tanimë është dyfishuar.
“Në vitin 2022 janë pranuar 40 mijë e 826 lëndë te natyrës civile e që mendohet se rreth 40% e lëndëve të pranuara janë të kësaj natyre. Kjo i bie se vetëm gjatë vitit 2022, konsiderohet se rreth 16 mijë e 330 lëndë civile janë lëndë të cilat rrjedhin nga kontekstet që ndërlidhen me moszbatimin e obligimeve nga kontratat kolektive”, thuhet në raport.
Gëzim Shala nga IKD, tha se gjatë monitorimit kanë gjetur se nuk ka zbatim të Ligjit për Mbrojtje nga Diskriminimi.
“Kemi një moszbatim të Ligjit për Mbrojtjen nga Diskriminimi pasi që përkundër faktit se në padi të ndryshme ngritët pretendimi për diskriminim, paditë nuk ngritën në bazë të këtij ligji”, tha Shala.
Ndërsa, Aurela Merlaku nga ky institut, tha se nga vitit 2018 numri i rasteve civile të pazgjidhura është dyfishuar.
“Numri i lëndëve të pazgjidhura në fushën civile është dyfishuar. Numri i lëndëve të pazgjidhura është rritur në vazhdimësi. Në vitin 2018 numri i lëndëve te pazgjidhura nga Gjykatat Themelore ishte 44.213, në vitin 2019-47,926 në vitin 2020 ishte 64,414, në vitin 2021 ishte 85,087 ndërsa në vitin 2022 ishte 99,407”, theksoi ajo.
Instituti i Kosovës për Drejtësi ka kërkuar nga KGJK që të kujdeset që gjykatësit të shpërndahen proporcionalisht me ngarkesën e lëndë që i ka një gjykatë në mënyrë që të ulet numri i lëndëve të pazgjidhura.
