Paratë false, janë kthyer në shqetësim për qytetarët dhe shumë kompani, të cilat në pamundësi për t’i siguruar pajisjet për verifikimin tyre kanë vendosur që paratë më të piketuara për falsifikim, të mos i pranojnë fare.
Një vendim të tillë me monedhën ‘2 euro’, e ka marrë Kompania Rajonale e Ujësjellësit “Prishtina”.
“Ne e kemi ndërprerë marrjen e këtyre monedhave derisa të gjejmë mundësinë për blerjen e ndonjë detektori që do i detektojë edhe monedhat metalike”, tha Arjeta Mjeku, zëdhënëse në Kompaninë Rajonale të Ujësjellësit “Prishtina” .
Përveç kompanisë së Ujësjellësit, një vendim të tillë muaj më parë e kishte marrë edhe kompania ‘Prishtina Parking’.
Se rastet e falsifikimit të parave janë kthyer në trend shqetësues, e thonë edhe të dhënat nga Policia e Kosovës.
Vetëm gjatë periudhës janar-qershor të vitit 2023, 486 raste janë paraqitur në Policinë e Kosovës për paratë e falsifikuara.
Ndërkaq, të dhëna të tjera japin nga Agjencia e Kosovës për Forenzikë.
“Gjithsej, me kartëmonedha i kemi 322 raste me 2.412 dëshmi, prej tyre kartëmonedha më e falsifikuar rezulton 50 euro. Ndërsa për monedha metalike, i kemi pas 61 raste me gjithsej, 14.204 dëshmi, prej tyre prin si zakonisht monedha 2 euro”, tha Nadire Ibrahimi, Specialiste e Lartë për Dokumente dhe Dorëshkrime në Agjencinë e Kosovës për Forenzikë.
Ndërkaq, sipas Agjencisë së Kosovës për Forenzikë, kartëmonedha prej 100 eurove ka qenë më e falsifikuara vitin e kaluar.
