Ministria e Kulturës, Rinisë dhe Sportit ka nënshkruar sot memorandume për mbështetjen financiare të federatave sportive për vitin 2025, duke siguruar një fond prej rreth 8 milionë eurosh.
Nga kjo shumë, sipas zëvendësministres Daulina Osmani, së paku 30% do të dedikohet për aktivitetet sportive të vajzave dhe grave, me qëllim fuqizimin dhe zhvillimin e sportit femëror në Kosovë.
“Sot janë nënshkruar memorandume për mbështetje financiare vjetore për vitin 2025, me Komitetin Olimpik të Kosovës, Komitetin Paralimpik, Olimpiadën Speciale të Kosovës, Federatën e Xhudos, Mundjes, Boksit, Aeronautikes, Gjimnastikës, Muay thai, Federatën e Autosporteve, Kickbox, Bodybuilding, Federatën e Padelit, Pikados, Futbollit, Volejbollit, Sportit Shkollor, Shahut, Sportit Universitar, Boullingut, Esports, Golfit, Motociklizmit, Biliardos, Ragbit, Atletikës, Shenjtarisë, Federatën e Sporteve për të Verbër, Federatën e Skitarisë, Badmingtonit, Kajakimit, Çiklizmit, Taekwondos, të Peshëngritjes dhe Federatën e Tenisit”, ka njoftuar MKRS. Zëvendësministrja Daulina Osmani i njoftoi federatat prezente që sivjet është paraparë që çdo federatë ta ketë për obligim që së paku 30% të shumës totale të përfitimit t’ia dedikojnë aktiviteteve sportive për vajza dhe gra, me qëllim të zhvillimit dhe fuqizimit të mëtejmë të sportit femëror në vend. Shuma totale për mbështetje të të gjitha federatave sportive këtë vit është afër 8 milionë euro”.
