Dhjetëra mjekë të huaj tash e disa javë janë në pritje për t’u licencuar, por lëndët e tyre ende nuk janë shqyrtuar pasi kryesuesi i Bordit për Licencimin e Profesionistëve të huaj gjendet në izolim nga Covid-19.
Dhjetëra mjekë të huaj në Kosovë janë ankuar se nuk po mund të ushtrojnë profesionin e tyre tash e disa javë pasi janë ende në pritje për t’u licencuar ose rilicencuar nga Ministria e Shëndetësisë.
Ata kanë dorëzuar në MSH dosjet e tyre për licencim, por ende nuk kanë marr asnjë përgjigje nga ky institucion.
Kjo për shkak se Bordi për Licencimin e Profesionistëve të huaj ende nuk është mbledhur për t’i shqyrtuar lëndët e tyre. Kjo situatë ka ndodhur pasi kryesuesi i Bordit Hysni Jashari është prekur nga Covid-19 dhe i njëjti gjendet në izolim.
Të paktën ky ka qenë arsyetimi nga Ministria e Shëndetësisë kur është pyetur për këtë çështje.
“Janë pranuar një numër i vogël i kërkesave dhe do të shqyrtohen sapo kryesuesi i këtij Bordi të përfundojë ditët e izolimit për shkak të COVID-19 dhe të sigurojë pjesëmarrjen e nevojshme të anëtarëve të tjerë të Bordit në takimin e thirrur për ditë më parë, por që ishte shtyrë për shkak të arsyeve të lartpërmendura nga kryesuesi i Bordit. Këto janë takime që thirren sipas kërkesave që parashtrohen dhe brenda disa ditësh mbahet takimi i radhës, me që është caktuar të mbahet”, thuhet në përgjigjen e MSH-së.
Mjekët e huaj janë të obliguar të regjistrohen dhe të licencohen pranë Ministrisë së Shëndetësisë, për të ushtruar profesionin e tyre në Kosovë./gsh/
