Ministrja e Arsimit, Shkencës, Teknologjisë dhe Inovacionit, Arbërie Nagavci, ka thënë se janë në proces të ndërtimit të katër çerdheve të reja në Prizren, Mamushë, Deçan e Milloshevë.
Në konferencën javore, Nagavci krahas lajmit për hapjen e tenderit për këto çerdhe, gjithashtu ka dhënë detaje edhe për ndarjen e 70 bursave.
“Aktualisht i kemi të hapur tenderin për ndërtimin e katër çerdheve në Deçan, Prizren, Mamushë dhe Milloshevë dhe ftoj kompanitë që të ofertojnë për këto projekte. Si Ministri jemi të përkushtuar për ofrimin e kushteve më të mira për fëmijët”.
“Vlera e bursës për nxënës do të jetë 500 euro për 1 vit shkollor, prej tyre 40 në drejtimet deficitare dhe 30 në drejtimet teknike. Në drejtimet deficitare mund të aplikojnë të gjithë nxënësit e IAAP-ve, ndërsa për drejtimet teknike vetëm vajzat”, tha Nagavci.
Ajo sqaroi se bursat për drejtimet deficitare, janë; Zhvillues i aplikacioneve softuerike, Instalues elektrik, Veterinë, Mekatronikë, Asistent i turizmit dhe udhëtimeve, Përpunimi i drurit/zdrukthtar, Hortikulturë. Ndërsa në bursat për vajza në drejtimet teknike, Metalpunues, Instalues elektrik, Instalues i ngrohjes, klimatizimit dhe ujësjellësit, Automekanik, Teknologjia e reciklimit, Teknik i sistemeve të TIK-ut.
Mes tjeras ministrja Nagavci në këtë rast foli edhe për pakon ligjore për përmirësimin e cilësisë në arsim, që ka të bëjë me zhvillimin e mësimdhënësve.
“Ftoj mësimdhënësit dhe drejtorët që t’i dorëzojnë komentet që do të jenë të hapura deri më 7 qershor”, tha tutje Nagavci.
