Ministrja e Arsimit, Arbërie Nagavci, ka folur për rastet e raportuara të plagjiaturës nga profesorë të Universitetit të Prishtinës “Hasan Prishtina”.
Nagavci ka bërë të ditur se është planifikuar që në vitin e ardhshëm të krijohet një platformë anti-plagjiaturë për punimet shkencore.
“Në buxhetin e vitit 2023 kemi ndarë një shumë për 150 mijë eurove për sistemin anti-plagjiaturë, e cila do të vihet në funksion në të gjitha institucionet e arsimit të lartë”, ka thënë ministrja.
Organizata për Rritjen e Cilësisë në Arsim (ORCA), javën e kaluar në konferencë për media ka njoftuar se Këshilli i Etikës së Universitetit të Prishtinës “Hasan Prishtina” ka marrë një vendim sa i përket denoncimit të tyre për plagjiaturë për profesorët e Fakultetit Filozofik, Bujar Dugolli dhe Ardian Kastrati.
ORCA tha se më 6 qershor 2022, Këshilli i Etikës i ka kthyer përgjigje ORCA-s duke konstatuar përfundimisht se punimi i paraqitur nga profesorët Dugolli dhe Kastrati ka përmbajtje të theksuar të plagjiaturës dhe si rrjedhojë i ka shkelur të gjitha standardet e ndershmërisë akademike dhe kredibilitetit në publikime shkencore. “Këshilli i Etikës ka shqiptuar masa ndaj dy anëtarëve të stafit akademik, duhet të kemi parasysh se masat e tilla duhet të kenë efekt parandalues në të ardhmen”, ka thënë Ngavci.
