Ministrja e Industrisë, Ndërmarrësisë dhe Tregtisë, Rozeta Hajdari, mori pjesë sot në panairin më të madh botëror të industrisë së ushqimit, “Sial Paris”, që po zhvillohet në Paris të Francës. Ky eveniment i rëndësishëm është një qendër inovacioni në fushën e ushqimit, duke bashkuar prodhuesit, shpërndarësit, restorantet dhe importuesit-eksportuesit nga e gjithë bota.
Në këtë panair, Ministrja Hajdari ishte e shoqëruar nga Kryeministri Albin Kurti dhe Ministri Faton Peci, si dhe Ambasadori ynë në Francë, Mehdi Halimi. Ata vizituan shtandin e Kosovës, ku ishin të pranishëm tetë biznese vendase që po ekspozonin produktet e tyre.
Pjesëmarrja e këtyre bizneseve në Sial Paris është mbështetur me një fond prej 100,000 eurosh nga Agjencia për Investime dhe Përkrahjen e Ndërmarrjeve (KIESA), në kuadër të Ministrisë së Industrisë. Bizneset si Agro Florentina, Ananas Impex VITA FOOD, CAMEL, B.B.F Company, ABI Progress, ASK Foods dhe Jaffa Plus ishin disa nga përfaqësuesit e Kosovës në mesin e 7,500 kompanive ekspozuese nga 125 shtete, në një hapësirë prej 257,000 m².
“Këto biznese po promovonin një gamë të gjerë produktesh, përfshirë produkte nga industria e përpunimit të produkteve bujqësore, pemë dhe perime, produkte konditorike, fruta të imta e të ngrira industriale, pije energjike dhe lëngje frutash. Gjatë vizitës, përfaqësuesit shqiptarë Kraco dhe Agro Blend Group gjithashtu u takuan, duke theksuar rëndësinë e këtij eventi”.
