Ministri i Punëve të Brendshme, Xhelal Sveçla gjatë qëndrimit të tij në Republikën e Turqisë është takuar me ministrin e Mbrojtjes të Republikës së Turqisë, Yaşar Güler.
Në këtë takim siç thuhet në komunikatë, ministri Sveçla ka falënderuar ministrin e Mbrojtjes së Republikës së Turqisë, për mbështetjen e vazhdueshme që kanë dhënë për Kosovën, si dhe për mundësitë e shumta për bashkëpunim mes institucioneve.
Gjatë këtij takimi u diskutua për situatën e sigurisë dhe sfidat me të cilat po përballen të dy vendet.
Në këtë takim, ministri Sveçla thuhet se ka potencuar gatishmërinë e Republikës së Kosovës për të garantuar rend dhe siguri, si dhe rëndësinë për përkrahjen e partnerëve tanë në këtë aspekt.
Gjatë vizitës në Turqi, ministri Sveçla ka zhvilluar takim edhe me homologun e tij, Ali Yerlikaya.
Në këtë takim, ministri Sveçla vlerësoi marrëdhënien e shkëlqyeshme në mes të dy vendeve, ndërsa u diskutua edhe për sfidat aktuale dhe mundësitë e reja për thellimin e bashkëpunimit, me theks në fushën e sigurisë dhe teknologjisë, në të cilat Turqia ka shënuar arritje mbresëlënëse.
Ministri Sveçla me këtë rast ka falënderuar Republikën e Turqisë, e cila ka mbështetur Republikën e Kosovës që nga shpallja e pavarësisë, e përgjatë gjithë procesit të shtetndërtimit, veçanërisht në fushën e sigurisë përmes ngritjes së kapaciteteve njerëzore dhe atyre teknike.
Gjatë këtij takimi, në frymën e gatishmërisë për të shkëmbyer përvojat më të mira dhe arritjet në fushat që ministritë e dy vendeve mbulojnë, ministri Sveçla ka kërkuar që ky bashkëpunim të shtrihet edhe në ekspertizat specifike, që do të kontribuojnë në sigurinë e përgjithshme në Republikën e Kosovës.
