Ministri i Punëve të Brendshme të Kosovës Xhelal Sveçla, është duke qëndruar në një viztë zyrtare në Belgjikë, pas takimit me Zëvendës Kryeministren e Ministren e Administratës Publike, Prof.Dr. Petra De Sutter, ai është takuar edhe me Ministren e Punëve të Brendshme të këtij shteti, Znj. Annelies Verlinden.
Në postimin në llogarinë e tij në Facebook, ministri Sveçla ka thënë: Gjatë qëndrimit në Bruksel pata kënaqësinë të pritem nga Ministrja e Punëve të Brendshme, Znj. Annelies Verlinden me të cilën biseduam për marrëdhëniet tona të shkëlqyera në fushën e sigurisë dhe bashkëpunimit policor.
E falënderova për mbështetjen e vazhdueshme të shtetit belg për Republikën e Kosovës, si dhe shpreha gatishmërinë e institucioneve tona për thellimin e bashkëpunimit. Me këtë rast, ritheksova se Kosova mbetet e përkushtuar në rrugën e saj drejt integrimit evropian dhe antarësimit në NATO si dhe ka përmbushur të gjitha kriteret për liberalizimin e vizave e të cilat janë konfirmuar në vazhdimësi dhe nga Komisioni Evropian.Gjithashtu, biseduam për progresin qe kemi arritur në luftimin e krimit dhe korrupsionit, progres ky i konfirmuar edhe nga organizatat kredibile botërore, thuhet në postimin e ministrit Sveçla.
Sipas ministrit Sveçla, Znj. Annelies Verlinden, është shprehur e kënaqur me bashkëpunimin mes institucioneve si në fushën e riatdhesimit e ripranimit, po ashtu edhe në fushën e bashkëpunimit policor, me ç’rast është theksuar përkushtimi i saj që ky bashkëpunim të formalizohet edhe me marrëveshje për bashkëpunim policor vitin e ardhshëm.
