Ministri i Punëve të Brendshme, Xhelal Sveçla ka kujtuar Astrit Deharin, në shtatë vjetorin e vdekjes së tij.
Sveçla thotë se drejtësia dhe llogaridhënia për vrasjen e tij janë të pashmangshme, transmeton Telegrafi.
“Sot bëhen 7 vite pa shokun e bashkëaktivistin tonë Astrit Dehari. Mungesa e tij në mesin tonë është e madhe, teksa zvarritja e zbardhjes së vrasjes së tij rëndon dhimbjen tonë të përbashkët”, shkruan ai në Facebook.
Tutje, ai ka shkruar “Astriti, ky aktivist i shquar i dijes dhe i punës, na mungon çdo ditë e më shumë ndërsa idealet e tij janë dhe do të jenë gjithmonë udhërrëfyesi në angazhimet tona të përditshme”.
Aktivisti i Lëvizjes Vetëvendosje, vdiq më 5 nëntor 2016 në Burgun e Prizrenit, në rrethana ende të paqarta.
Ai po mbahej në paraburgim nën dyshimet për sulm ndaj Kuvendit të Kosovës, i cilësuar si akt terrorist. Por procesi i mëvonshëm nxori të pah se ato pretendime ishin të pa bazuara dhe aktivistët u lanë të lirë.
Në nderim të tij, Vetëvendosje ka organizuar sot disa aktivitete, ku paradite janë bërë homazhe te varri i tij, në Zllatar. Pasdite do të bëhen edhe disa aktivitete.
