Gjithçka është gati për fillimin e kthimit të veturave me targa ilegale në targa RKS, ka thënë Ministria e Punëve të Brendshme të premten nga një takim që ministri Xhelal Sveçla ka pasur me koordinatorët e Qendrave për Regjistrimin e Automjeteve (QRA).
Më 1 gusht nis afati i fundit shtesë që qytetarët në veri të kthejnë targat e tyre në RKS.
Nga muaji qershor, Qeveria vendosi t’ua japë dy muaj afat qytetarëve që të largojnë targat ilegale.
Në veri deri tash ka pasur disa reagime kundër vendimit, ndërsa nuk kanë munguar as deklarata të krerëve të Serbisë.
Sipas njoftimit të MPB-së të premten, ministri Sveçla ofroi mbështetjen e plotë të tij dhe të Qeverisë, më qëllim të realizimit të këtij objektivi, që është në të mirë të të gjithë qytetarëve, sepse përmirëson sigurinë në trafik, ulë numrin e veturave pa regjistrim dhe përmirëson sigurinë në përgjithësi”.
Afati për kthim të tabelave në RKS zgjat deri më 30 shtator. Në këtë periudhë janë ofruar lehtësira në procesin e kthimit targa RKS.
Nga fundi i javës së kaluar, MPB ka filluar fushatën informuese duke njoftuar qytetarët se nga dita 1 gusht deri më 30 shtator 2022 do të fillojë procesi i regjistrimit të targave ilegale në RKS në të gjitha qendrat e regjistrimit të automjeteve. Gjatë kësaj periudhe qytetarët do të kenë mundësinë të përfitojnë shumë lehtësira për kthimin e automjeteve në targa të regjistrimit RKS./KosovaNews/