Ministri i Bujqësisë, Pylltarisë dhe Zhillimit Rural, Faton Peci, ka vizituar kompaninë me traditë që nga vitet e 70-ta ,”Fresco Group”, e cila ka thënë se gjeneron afër 12 milionë euro qarkullim vjetor, punëson rreth 90 punëtorë të rregullt dhe grumbullon prodhime afërsisht nga 300 fermerë vendorë.
Sipas ministrit, nga ky vit, do të ketë rritje substanciale të përkrahjes jo vetëm përmes programeve ekzistuese por edhe përmes iniciativave legjislative apo konkretisht Ligjit për Kooperativat Bujqësore si dhe Ligji për Organizimin e Tregut të Përbashkët.
“Kjo mbështjetje do të përkthehet në Programin për Zhvillim Rural 2023 për pikat grumbulluese dhe depot për ruajtjen e pemëve dhe perimeve pasi që investime të këtij lloji i japin produkteve vendore vlerë të shtuar në zinxhir të prodhimit dhe jetëgjatësi në treg.
Në këtë mënyrë thjeshtojmë plasimin e prodhimit vendor në treg dhe një qasje e tillë, bujk – depo (pikë grumbulluese) – treg si rregullator, do të mundësojë që hap pas hapi përkrahja përmes Programit për Pagesa Direkte / Subvencioneve të orientohet dhe të bazohet në rendiment. Kështu do të kemi pasqyrim të saktë të prodhimtarisë vendore dhe sukses edhe më të prekshëm”, ka thënë Peci.
Ministri Peci ka thënë se gjatë vizitës në kompaninë me traditë që nga vitet e 70-ta “Fresco Group” ka parë nga afër funksionimin e zinxhirit të vlerës që nga kontakti i parë me bujkun e deri tek kontakti i fundit me konsumatorin e prodhimeve të tokës sonë.
“Agrobiznesi “Fresco Group” operon suksesshëm në tregun vendor, por edhe në tregjet e eksportit e deri tek shitja e produkteve finale, pasi që vepron si kompani edhe brenda rrjeteve të supermarketeve. Si rrjedhojë, kompania në fjalë e mbyll komplet zinxhirin e vlerës nga prodhimi deri tek shitja me pakicë, pra deri tek klienti i fundit.
“Fresco” gjeneron afër 12 milionë euro qarkullim vjetor, punëson rreth 90 punëtorë të rregullt dhe grumbullon prodhime afërsisht nga 300 fermerë vendorë”, ka thënë ministri Peci.
