Ministri i Bujqësisë, Pylltarisë dhe Zhvillimit Rural, Faton Peci e ka vizituar një fermer nga komuna e Mitrovicës, i cili ka përfituar mbështetje prej rreth 100 mijë euro nga Qeveria e Kosovës.
Me rastin e vizitës në Koshtovë, ministri Peci ka thënë se ky është ndryshimi që ka sjell Qeveria Kurti.
“Mirëmëngjesi nga Koshtova e Mitrovicës! ‘John Deere’ në Koshtovë, përmes përkrahjes institucionale. Para dhe pas investimit përmes granteve, gjendja e shtallës së Sabit Grepit ishte dhe është siç është paraqitur përmes forografive të mëposhtme! Kjo është dora e shtetit dhe mbështetja konkrete financiare; 99,882 euro është vlera e projektit për ndërtimin e shtallës për mbarështimin e viçave për majmëri”, ka thënë Peci.
Tutje ministri vlerësoi edhe punën e bujkut që ka përfituar mbështetjen, duke thënë se Sabiti është një bujk e blegtor pensionist i cili tërë jetën e tij ka punuar ndershmërisht dhe se kjo ndershmëri dhe mundi shpërblehet.
“Posedon rreth 2.5 hektarë tokë të veten ndërsa merr me qira edhe 12.5 hektarë në të cilat kultivon grurë, misër, 500 trupa mollë, kullosë e jonxhe. Kur puna flet!”, ka shkruar ministri Peci.
