Ministri i Financave, Punës dhe Transfereve, Hekuran Murati iu është kundërpërgjigjur kritikave të partive opozitare për krizën në vend, e sidomos deputetit dhe kreut të PDK-së, Memli Krasniqi, i cili për krizat glogale ka fajësuar dhe cilësuar qeverinë si të paaftë.
Në reagimin e tij, ministri Murati tha se me inflacion janë prekur të gjitha vendet e botës, ndërsa potencoi ato se çfarë janë bërë deri tani nga ekzekutivi për të tejkaluar gjendjen.
“Ne si qeveria kemi bërë më së shumti deri më tani, në krahasim me atë që kanë bërë të gjitha qeveritë e kaluara. Secili pensionistë ka marrë mbi 420 euro, kemi ndarë shtesa për studentë, për familjet që kanë nevojë, kemi ndarë subvencione për bujqësinë, etj”, tha ai.
Murati ka thënë se Krasniqi ishte i zëshëm për krizën që ka kapluar Kosovën, duke shtuar se nuk ka dëgjuar që më të zëshmit të jenë shtresa më e pasur që janë politikanë ose deputetë.
“Kemi nda shtesa për pensionistë studente e familjet në asistencë sociale. Hiq më larg se dje kemi ndarë 18 milionë për bujqësinë. Çka nuk mund të kompensojmë janë humbjet në kriptovaluta. Nëse dikujt i është vështirësuar gjendja financiare për shkak të humbjeve në kriptovaluata kërkojmë falje por nuk mund t’i kompensojmë”, ka thënë ministri Murati.
Kujtojmë se Memli Krasniqi vitin e kaluar ka deklaruar se ka mbi 330 mijë euro në kriptovaluta.
Vlera e këtyre kriptovalutave ishte llogaritur sipas datës 28 qershor 2021. Krasniqi kishte deklaruar se ka 100 Etherum, mandej bitcoin, si dhe 400 DOT, 1000 ETC e shumë kritpo të tjera, që të total ka investime në 35 lloje të kriptovalutave.
