Ministri i Mbrojtjes së Kosovës, Armend Mehaj i ka uruar qytetarët amerikan për përvjetorin e pavarësisë së SHBA-së, veçanërisht ushtarakët e Ushtrisë Amerikane për shërbimin vetëmohues për ruajtjen e paqes, sigurisë dhe stabilitetit në vendin tonë dhe anekënd Botës.
Mehaj ka thënë se sot bashkë me urimin e 4 Korrikut, kujtojmë dhe nderojmë të gjithë burrat e gratë e kombit amerikan, të cilët me sakrificë të madhe dhe vendimin e tyre historik ndryshuan fatin, jo vetëm të kombit amerikan, por edhe të gjithë popujve tjerë liridashës në Botë.
Ministri që drejton Ushtrinë e Kosovës, tha se vlerat amerikane, natyrshëm janë pjesë e identitetit tonë shtetëror dhe qytetarë, sepse sipas tij, “e kaluara, e tashmja dhe e ardhmja jonë qëndrojnë të palëkundura në themelet e Lirisë, Barazisë dhe Drejtësisë së 4 Korrikut”.
“Urojmë nga zemra të gjithë burrat e gratë e vendit mik, SHBA-së, me të cilët bashkë, si një trup i vetëm, po rrugëtojmë në zhvillimin dhe forcimin e Republikës së Kosovës. Urim të veçantë, gjithashtu, për të gjithë, ushtarakët e Ushtrisë Amerikane për shërbimin vetëmohues për ruajtjen e paqes, sigurisë dhe stabilitetit në vendin tonë dhe anekënd Botës”, ka shkruar Mehaj.
Ministri Mehaj ka shtuar se Kosova si gjithmonë është dhe do të jetë bashkë me SHBA krah për krah, si në luftë ashtu edhe në paqe./Kosovanews/
