Korporata Energjetike e Kosovës (KEK sh.a.) ka reaguar ashpër ndaj një artikulli të publikuar nga gazetari Lirim Mehmetaj, duke e cilësuar atë si dezinformatë me qëllim diskreditimi personal dhe profesional ndaj punonjësit të saj, z. Taulant Kurti.
Në reagimin zyrtar, KEK shpreh “shqetësim dhe indinjatë” për publikimin dhe përhapjen e informacionit që, sipas tyre, tenton të njollosë emrin e z. Kurtit, i cili është pjesë e korporatës që nga viti 2007. Sipas KEK-ut, Kurti ka ushtruar pozita të qarta profesionale, pa asnjë përfshirje në sektorin e tregtimit të energjisë elektrike.
“Pozita e tij aktuale si Specialist për Çështje Ekonomike në kuadër të Drejtorisë së Operimeve nuk ka të bëjë aspak me tregtimin e energjisë. Çdo insinuatë për të kundërtën është e pabazë dhe me tendencë për ta diskredituar atë publikisht,” thuhet në deklaratë.
KEK gjithashtu nënvizon se z. Kurti është vlerësuar ndër vite për profesionalizmin dhe integritetin e tij, duke kërkuar nga mediat që të respektojnë standardet e gazetarisë etike dhe të verifikuar.
Korporata e konsideron këtë rast si tentativë për shpifje dhe njollosje dhe bën thirrje për përgjegjësi në raportimin publik.
