Ministri i Mbrojtjes, Armend Mehaj përmes një video-mesazhi të publikuar në rrjetin social Facebook, iu ka bërë thirrje të rinjve dhe të rejave të Kosovës që t’i bashkohen Forcës së Sigurisë së Kosovës.
Mehaj ka thënë se kanë mbetur edhe një javë deri në mbylljen e procesit të tretë të rekrutimit brenda dy viteve.
“Të dashur qytetarë, të rinj e të reja të këtij vendi. Kanë mbetur vetëm edhe një javë deri me datën 15 janar kur do të mbyllim zyrtarisht konkursin e rekrutimit të 612 ushtarëve aktiv dhe 388 ushtarëve të komponentës rezervë. Pra një javë deri të mbyllja e procesit të tretë të rekrutimit brenda dy viteve, për t’i shtuar në radhët e Forcës së Sigurisë së Kosovës edhe 1000 të rijnë që do t’i shërbejnë atdheut. Kanë mbetur vetëm edhe 168 orë kur do të filloj procesi i përzgjedhjes së atyre që do të bartin uniformen e nderit, simbolin e shtetit dhe besimin e popullit. Andaj të rinj e të reja të këtij vendi, pa dallim etnie, ju ftoj të aplikoni për t’iu bashkangjitur Ushtrisë së Republikës së Kosovës që ka një vizion të qartë drejt anëtarësimit në NATO”, ka thënë Mehaj.
Ministria e Mbrojtjes prej 15 dhjetorit 2022 e deri më 15 janar 2023 e ka hapur konkursin për rekrutimin e 612 ushtarëve aktiv dhe 388 pjesëtarëve të komponentës rezervë të Forcës së Sigurisë së Kosovës (FSK), raporton KosovaNews.
Ky konkurs është i hapur për të gjithë ata që janë të interesuar dhe i plotësojnë kushtet për të qenë në forcat e armatosura.
“Ministria e Mbrojtjes njofton të gjithë të rinjtë e të rejat se mundësia e konkurrimit është për të gjithë të interesuarit për aplikim nga mosha 18 – 25 vjeç, shtetas të Republikës së Kosovës. Për procedurat e aplikimit dhe përzgjedhjes, procedurat e testimit dhe kriteret, si dhe dokumentet e kërkuara për aplikim, ju njoftojmë në shpallje të konkursit që është në linkun: https://mod.rks-gov.net”, thuhet në njoftim.
Ndërsa kandidatët duhet të plotësojnë formularin e aplikimit online dhe t’i bashkëngjisin të gjitha dokumentet tjera të kërkuara nga ky formular.
Këtu gjeni formularin:
https://rekrutimi.fsk-rks.org/Apply
Ministria e Mbrojtjes edhe në këtë rast thekson se të gjithë të interesuarve, ju garanton proces të drejtë dhe transparent, në zbatueshmëri të plotë të procedurave dhe kritereve ku do të zgjidhen më të mirët prej më të mirëve.
“Ministria e Mbrojtjes mirëpret aplikacione të të gjithëve me inkurajim të vajzave e grave dhe të gjithë të rinjëve e të rejave pa dallim nga përkatësia e tyre etnike. Bëhu ushtar i Republikës së Kosovës!”, thuhet në njoftim nga MM./KosovaNews
