Ministri i Mbrojtjes i Republikës së Kosovës, Armend Mehaj në ditën e shënimit të njëvjetorit të fillimit të agresionit rus në Ukrainë, ka thënë se ka besim të plotë se e mira do të triumfoj mbi të keqen dhe se Ukraina do të dalë fitimtare në të drejtën e saj dhe popullit të saj.
Sot është mbushur një vit luftë në Ukrainë, pasi më 24 shkurt 2022 Rusia filloi sulmin e paprovokuar ndaj Ukrainës.
Ministri Mehaj ka shprehur edhe një herë përkushtimin e Republikës së Kosovës për të mbështetur Ukrainën dhe rezistencën e saj heroike për çlirim të plotë nga okupatori.
“I vetmi “faj” i Ukrainës ishte sepse u përcaktuan që fati i tyre politik të jetë demorkacia, BE dhe NATO. Edhe pas një viti forcat okupatore Ruse vazhdojnë luftën kriminale dhe shkatërrimin e Ukrainës, ndërsa Ukraina vazhdon rezistencën heroike për çlirim të plotë nga okupatori. Kosova është krenare që u rreshtua me botën demokratike kundër agresionit Rus. Jemi të përkushtuar të vazhdojmë mbështetjen e Ukrainës në kuadër të Grupit të Kontaktit për Ukrainën, ku jemi anëtar krah për krah me aleatët tanë nga NATO dhe BE”, ka shkruar Mehaj.
Në këtë rast ministri kosovar theksoi se regjimet autokratike mbesin kërcënim për paqen kudo në botë, por edhe në rajonin tonë.
“Serbia me regjimin e saj autokratik mbetet aleati i vetëm i Rusisë në fqinjësinë tonë. Por, edhe ne mbesim të palëkundur në orietimin tonë drejt NATO-së dhe BE-së. Mbesim me besim të plotë se e mira do të triumfoj mbi të keqen dhe se Ukraina do të dalë fitimtare në të drejtën e saj dhe popullit të saj. Lavdi Ukrainës!”, ka shkruar ministri Mehaj.
