Ministri i Kulturës, Rinisë dhe Sportit, Hajrulla Çeku, ka thënë se shtëpitë tradicionale në Janjevë do t’i rikthehen komunitetit të gatshme për rifunksionalizim dhe shfrytëzim.
“Përmes projektit për revitalizimin e qytetit të vjetër të Janjevës, shtëpitë po restaurohen dhe po u ruhen karakteristikat, ndërsa me funksionalizimin e tyre mund të shndërrohen në bujtina për vizitorë, punëtori artizanale, të përdoren si shtëpi banimi apo hapësira për aktivitete kulturore”, ka thënë ministri.
Çeku ka theksuar se restaurimi po vazhdon sipas dinamikës, ndërsa paralelisht po punohet në fuqizimin e kapaciteteve lokale për ofrimin e shërbimeve cilësore turistike.
