Ministri për Kulturë, Rini e Sport, Hajrulla Çeku ka pritur sot boksieren Donjeta Sadiku, e cila ditë më parë e siguroi normën për pjesëmarrje në Lojërat Olimpike “Paris 2024”.
“Vajzat po dominojnë me suksese në sport. Donjetën e prita sot në kabinet pas sigurimit të normës olimpike për Paris 2024. Na premtoi medalje në Lojërat Olimpike. I uroj shumë suksese në Paris”, ka shkruar ministri Çeku në Facebook.
Boksierja Donjeta Sadiku ka siguruar normën olimpike për Lojërat Olimpike Paris 2024, për të parën herë në historinë e boksit kosovar pas pavarësimit.
Donjeta një sukses të tillë e arriti pasi mundi italianen Alessia Mesiano në gjysmëfinalen e kategorisë -60 kilogram të turneut botëror kualifikues për Lojërat Olimpike Paris 2024.
Sadiku shënoi katër fitore radhazi për të arritur deri te norma olimpike.
Donjeta Sadiku në vitin 2022 fitoi medalje të bronztë në botërore dhe evropiane, derisa në Olimpiadën e Tokios ishte paraqitur me ftesë, por lëndimi ia kishte shuar ëndrrën për medalje.
