Ministri i Kulturës, Rinisë dhe Sportit, Hajrullah Çeku, ka reaguar ndaj akuzave të kryetarit të Lidhjes Demokratike të Kosovës (LDK), Lumir Abdixhiku, lidhur me pretendimet për bllokim të punimeve në Teatrin Dodona nga ana e ministrisë.
Në një postim publik, ministri Çeku i bëri thirrje kryetarit Abdixhiku që të jetë korrekt me të vërtetën dhe të mos e keqpërdorë fushatën elektorale për akuza të pabazuara. Ai publikoi dokumentin e pëlqimit të dhënë nga Instituti për Mbrojtjen e Monumenteve, si dëshmi se komuna ka vepruar sipas ligjit dhe rekomandimeve të profesionistëve.
“Pëlqimi për Dodonën është dhënë sepse komuna e ka respektuar ligjin dhe rekomandimet e profesionistëve. E njëjta vlen edhe për rastet e tjera,” tha Çeku, duke shtuar se asnjë projekt nuk ndalohet kur zbatohen procedurat ligjore.
Ai theksoi se përgjegjësia bie mbi ata që shkelin ligjet, e jo mbi institucionet që zbatojnë rregullat.
“Është në dorën tuaj,” i drejtohet ai Abdixhikut, “ose bëni lojë politike me projekte të interesit publik, ose respektoni rrugën institucionale dhe sigurohuni me pëlqimet e nevojshme për të vazhduar me punë.”
