Ministri i Infrastrukturës, Liburn Aliu, të martën ka vizituar kryetarin e Leposaviqit në ndërtesën komunale.
Ai u prit nga kryetari Lulzim Hetemi, i cili ka më shumë se 10 ditë i bllokuar brenda objektit.
Me të kuptuar për vizitën, protestuesit serbë filluan të shtohen para objektit të komunës.
Ndonëse ishte nën përcjelljen e Policisë së Kosovës, ministri Aliu gjatë kthimit nga komuna, njëra nga veturat me të cilat ai po udhëtonte është gjuajtur me ngjyrë.
Ndërkaq, edhe para tri ditësh, ministri Aliu kishte tentuar që të vizitonte kryetarin Hetemi, mirëpo ai nuk ishte lejuar nga KFOR-i që të kryejë këtë takim.
Megjithatë, këto raportime ishin mohuar nga ministri, i cili kishte thënë se ka qenë udhëzimi i Policisë së Kosovës që mos të vazhdohet më tutje, me qëllim që të shmangeshin tensionet.
“Përkundrazi, KFOR-i na kanë ofruar siguri, me një njësit të tyre që e kanë dërguar pikërisht për këtë qëllim. Në fakt, ka qenë udhëzimi i Policisë së Kosovës që mos të vazhdojmë më tutje, me qëllim që të shmangim tensionimin e situatës nga bandat kriminale që silleshin përreth”, kishte shkruar ai në Facebook.
