Ministrat e Jashtëm të Bashkimit Evropian do të diskutojnë sot në Luksemburg lidhur me tensionet në veri të Kosovës dhe dialogun Kosovë-Serbi.
Pritet që para ministrave të raportojë kryediplomati i BE-së, Josep Borell, dhe më pas të vazhdojnë diskutimet në këtë temë.
Nuk priten konkluzione apo vendime formale, përveç diskutimit të masave që mund të marrë blloku evropian për t’i bindur palët që të marrin hapa të menjëhershëm për uljen e tensioneve.
Siç ka raportuar korospodenti i Kohës në Bruksel, Augustin Palokaj, të martën do të raportojë emisari i BE-së për dialogun, Miroslav Lajçak në Komisionin për Politikë të Jashtme kur pritet debat lidhur me situatën dhe tensionet mes dy vendeve.
Tema do të jetë në rend dite edhe në takimin e vendeve anëtare që takohen të enjten edhe të premten në Bruksel.
Bashkimi Evropian ka pritur se do të ketë ulje të tensioneve pas takimeve të fundit që Borrelli ka pasur me dy liderët në Bruksel, një javë më parë.
Liderët nuk janë takuar me njëri-tjetrin, por vetëm me Borrellin, veç e veç.
Situata në Kosovë dhe procesi i normalizimit të raporteve mes Kosovës dhe Serbisë pritet të jenë temë diskutimi edhe në takimin e Këshillit Evropian, pra samitin e liderëve të vendeve anëtare.
Diçka e tillë, sipas diplomatëve të BE-së, tregon përkushtimin, por edhe shqetësimin që ka blloku për situatën në Kosovë dhe për raportet mes Prishtinës dhe Beogradit.
Nga këto takime pritet që Kosovës dhe Serbisë t’iu bëhet thirrje për uljen e menjëhershme të tensioneve dhe kthimin në dialog.
