Joan Laporta nuk e ka përjashtuar mundësinë e rikthimit të Lionel Messit në Barcelonë.
Presidenti i gjigantit katalunas, në konferencë për shtyp, gjatë prezantimit të Jules Kounde, ka folur edhe për yllin argjentinas, ndaj të cilit ai ndihet borxhli, shkruan “Gazeta Express”.
“Nuk e kam ndërmend të komentoj sepse është një lojtar i PSG-së. Më kanë pyetur edhe gjatë turneut amerikan dhe ishte një atmosferë më relaksuese. Nuk dua të flas pasi ai është lojtar i një klubi tjetër. Mendoj se e kemi një borxh ndaj tij, e kam thënë tashmë. Do ta shohim se çka do të ndodhë”, deklaroi Laporta.
Messi ka kontratë me parisienët edhe një vit dhe pastaj mund të rikthehet në “Camp Nou” ose të përfundojë në Shtetet e Bashkuara të Amerikës, atje ku e pret Inter Miami i David Beckhamit.
Shtatë herë fituesi i Topit të Artë ishte larguar nga Barcelona si lojtar i lirë vitin e kaluar, ndërsa e kishte zgjedhur “Parkun e Princave”, ku sezoni i tij i parë ishte dëshpërues. /Express/