Kryetari në ardhje i Mitrovicës së Jugut, Faton Peci, ka ndarë një moment të veçantë, duke treguar për takimin me mërgimtarin Faton Reka dhe djalin e tij, Elionin, nga Ferizaj, të cilët jetojnë në Cyrih të Zvicrës.
Peci ka bërë të ditur se Reka, i cili ka fobi nga fluturimi dhe në 20 vitet e fundit ka udhëtuar me aeroplan vetëm dy herë, kishte ardhur në Kosovë posaçërisht për ta uruar atë për fitoren në zgjedhje.
“Fatoni ka fobi prej fluturimit, e në 20 vite është nisë me aeroplan veç dy herë: herën e parë për ceremoninë e varrimit të Presidentit Rugova; e sot, veç me ardhë me m’uru për fitoren, fitoren e Mitrovicës e t’Kosovës,” ka deklaruar Peci.
Ai shtoi se ky gjest i Rekës simbolizon dashurinë dhe përkushtimin e mërgatës ndaj vendit.
“Me këtë gjest, ai solli me vete dashninë e mërgatës, e ju që po m’uroni anë e mbanë globit, ju falenderoj e ju jam përjetë mirënjohës,” ka shkruar Peci, duke theksuar se “kjo fitore është edhe e juaja”.
Peci u shpreh se mbështetja nga diaspora mbetet një prej forcave më të mëdha të suksesit të tij dhe të Kosovës.
