Drejtori i përgjithshëm i Policisë së Kosovës, Samedin Mehmeti, në vazhdën e takimeve të realizuara në Francë, ka realizuar takim me Fernand Gontier, drejtor i Policisë Kufitare.
Sipas Policisë, ndër temat kryesore të cilat u diskutuan në këtë takim ishin forcimi i bashkëpunimit kufitar, migrimi ilegal, trajnimet dhe teknikat e avancuara të kontrollit kufitar, si dhe luftimi i kontrabandës.
“Po ashtu pjesë e diskutimit në këtë takimi ka qenë edhe vlerësimi dhe ndihma në plotësimin e kritereve për liberalizimin e vizave. Takimi rezultoi me vullnetin dhe shprehjen e gatishmërisë për bashkëpunim të ndërsjellë në fusha të ndryshme e në veçanti me Policinë Kufitare”, thuhet në njoftim./kp/
