Ministri i Mbrojtjes Armend Mehaj ka dalë me të dhënat mbi aktivitetet e realizuara nga ministria që ai drejton në gjashtëmujorin e parë të këtij viti, e sipas të cilave janë realizuar 106 aktivitete nga 137 të planifikuara ose 77 për qind.
Publikimi i të dhënave vjen pas akuzave të Lëvizjes FOL, e cila sot në një konferencë për media tha se nuk ka marrë përgjigje nga ministria mbi aktivitetet e saj pavarësisht pyetësorit të dërguar.
Ministri Mehaj më herët tha se shumë shpejt këto përgjigje do të jenë në dispozicion.
Në një postim në Facebook, ministri ka thënë se do të punojnë që efikasiteti të rritet edhe më shumë.
“Ushtrinë e Republikës së Kosovës, do ta përgatisim dhe forcojmë çdo ditë, ajo është e gatshme ta mbrojë çdo cep të territorit të Republikës. Ngritja e ushtrisë sonë në nivel të ushtrive të vendeve të NATO-së është mision i yni që do ta përmbushim patjetër”, ka shkruar Mehaj.
Sa i përket transparencës dhe llogaridhënies, ai ka theksuar se Ministria e Mbrojtjes do të jetë e hapur për publikun për çdo gjë që lejohet të ketë qasje publiku, me përjashtim të informatave të klasifikuara. /kp/
