Ministri i Mbrojtjes, Armend Mehaj, ka thënë se bashkëpunimi ndërushtarak mes Kosovës dhe Shqipërisë është dyfishuar.
Ai ka theksuar se gjatë trajnimit të përbashkët një mujor, efektivë të njësive të këmbësorisë së forcave Shqipëri – Kosovë, kanë shkëmbyer eksperiencat e tyre.
“Në kuadër të bashkëpunimit bilateral me Ministrinë e Mbrojtjes dhe Forcave të Armatosura të Republikës së Shqipërisë, kemi arritur që të dyfishojmë bashkëpunimin ndërushtarak, që ndër të tjera ka rezultuar me ndërtimin dhe zhvillimin e aftësive dhe kapaciteteve të para të komponentës luftarake dhe mbështetjes luftarake të Forcës së Sigurisë së Kosovës”, ka shkruar Mehaj në Facebook.
Mehaj ka theksuar se së bashku janë të përkushtuar, për paqe dhe stabilitet në rajon dhe botë.
“Vizionin e përbashkët e mbështesim në konceptin “smart defense”, me mbështetjen dhe koordinimin e plotë me aleatin tonë jetik SHBA-në, gjithnjë në funksion të përmbushjes së misioneve tona kushtetuese, dhe në shërbim të paqes, stabilitetit dhe sigurisë së vendeve tona, rajonit tonë dhe botës liridashëse dhe paqedashëse. Së bashku gjithmonë jemi më të fortë”, ka shkruar Mehaj.
