Adhuruesit e kinemasë në Kosovë po presin me padurim premierën e filmit më të ri “Në Errësirën e Diellit – Kosova”, e cila do të mbahet më 27 gusht 2025, në orën 20:00, në sallën Cinemarine të Abi Çarshisë, në Prizren.
Në këtë ngjarje të veçantë do të marrin pjesë edhe aktorët e filmit, ndërsa biletat mund të sigurohen në sportelet e Cinemarine me çmimin 3,5 euro, shkruan KosovaNews.
Ky prodhim i kinematografisë turke trajton një nga ngjarjet më tronditëse të viteve të fundit në Kosovë – sulmin terrorist në Banjskë, të kryer nga grupe paramilitare serbe në shtator të vitit 2023.
Filmi vjen si vazhdim i rrëfimit të nisur me “Fytyra të Fshehura – Bosnja”, që trajtonte fshehjen e kriminelëve të luftës në Bosnjë e Hercegovinë. Kësaj here, fokusi zhvendoset drejt Kosovës dhe përballjes së saj me kërcënimet serioze të sigurisë pas ngjarjes së Banjskës.
Me regji të Haktan Özkan dhe prodhim të Çiçek Yapım, filmi sjell një përshkrim dramatik dhe emocional të atyre ditëve kritike. Ai përqendrohet në përpjekjet e agjentëve turq për të parandaluar një luftë të madhe që mund të shpërthente në Ballkan, duke pasqyruar njëkohësisht bashkëpunimin strategjik dhe operacional mes Kosovës dhe Turqisë në përballjen me këto kërcënime.
Në rolet kryesore shfaqen aktori me origjinë nga Kosova Gökhan Tunalıgil, si dhe Ayhan Krüezi dhe Ebru Taşçı. Në kastin e filmit janë gjithashtu aktorë të njohur si Ümit Acar, Müge Ulusoy, Bora Sivri, Ali Düşenkalkar, Ayhan Işık, si dhe artistja kosovare Sonay Buş.
Përveç premierës së hapur për publikun, më 28 gusht, në orën 19:30, do të organizohet një shfaqje e veçantë vetëm për të ftuarit në kinemanë Doku Kino.
Organizatorët u bëjnë thirrje adhuruesve të kinemasë që të mos e humbasin këtë mundësi unike për të takuar aktorët dhe për të përjetuar emocionin e një filmi që trajton një nga ngjarjet më të ndjeshme në historinë e re të Kosovës.
