Përpjekjet për të mbyllur strukturat paralele në veri të Kosovës po vazhdojnë me qëllim të rivendosjes së rendit dhe pengimit të ndikimit të grupeve të paligjshme.
Ministri në detyrë i Punëve të Brendshme, Xhelal Sveçla, ka theksuar se vetëm institucionet e Kosovës do të funksionojnë në territorin e saj.
Këto aksione të Policisë së Kosovës po ndiqen nga afër edhe nga Ambasada Gjermane në Prishtinë. Nga kjo ambasadë kanë shprehur shqetësim për ndikimin që mbyllja e menjëhershme e institucioneve paralele mund të ketë në jetën e përditshme të serbëve dhe komuniteteve tjera joshumicë.
“Po i monitorojmë zhvillimet dhe po mbledhim informacione për natyrën dhe rrethanat e këtyre veprimeve. Ndërsa raportet zyrtare flasin për operacione pa incidente, burime të tjera tregojnë një situatë të tensionuar në terren. Ne kemi theksuar vazhdimisht se mbyllja e menjëhershme e këtyre institucioneve ndikon negativisht në komunitetet joshumicë”, thuhet në reagimin e ambasadës.
Tutje, Ambasada Gjermane nënvizon se është e domosdoshme të ketë një qasje gjithëpërfshirëse që përfshin të gjitha komunitetet dhe siguron krijimin e strukturave alternative, funksionale dhe gjithëpërfshirëse.
Në deklaratën e saj, ambasada ka shprehur shqetësim se operacionet policore mund të thellojnë më tej tensionet dhe të dëmtojnë përpjekjet për afrimin e komuniteteve. Po ashtu, është përmendur edhe mesazhi i presidentit të Këshillit Evropian, Antonio Costa, i cili ka theksuar se heqja e masave është e lidhur ngushtë me de-përshkallëzimin e situatës në veri të Kosovës.
“Sikurse u tha nga presidenti i Këshillit Evropian, Antonio Costa, masat e vendosura ndaj Kosovës lidhen drejtpërdrejt me de-përshkallëzimin. Veprime që rrisin tensionet janë kundërproduktive dhe nuk kontribuojnë në heqjen e këtyre masave”, thuhet në reagim.
Ndërkohë, në kuadër të veprimeve në veri, autoritetet kanë ndërprerë aktivitetin e strukturave paralele në Fabrikën e ujit në Zubin Potok, me kërkesë të Njësisë për Monitorimin e Ndërmarrjeve Publike të Ministrisë së Ekonomisë.
Gjithashtu, është kthyer në pronësi të komunës së Mitrovicës së Veriut një objekt që më parë shfrytëzohej nga strukturat paralele, i njohur si Zyra për Sport, Rini dhe Shërbime të Specializuara. Veprim të ngjashëm ka pasur edhe në stacionin e pompave të ujit në fshatin Suhodoll.
Presidenti i Këshillit Evropian, Antonio Costa, gjatë vizitës së tij në Kosovë, ka ritheksuar rëndësinë e stabilitetit në veri për procesin e heqjes së masave sanksionuese ndaj Kosovës.
“Masat janë të lidhura me nevojën për të de-përshkallëzuar tensionet në rajon, në veçanti në veri të vendit. Shpresoj që këto zhvillime të fundit të mos shënojnë një trend të ri, por të mbeten përjashtim. Kosova duhet të vazhdojë angazhimin e saj në rrugën evropiane dhe në dialogun me Beogradin”, ka deklaruar Costa.
