Ministria e Arsimit, Shkencës, Teknologjisë dhe Inovacionit (MAShTI), ka organizuar për të pesëmbëdhjetin vit me radhë manifestimin tradicional “Festa e Abetares”, i cili këtë vit është mbajtur në qytetin historik të Prizrenit.
Në këtë ngjarje madhështore morën pjesë nxënës të klasave të para nga të gjitha trevat shqiptare: Kosova, Shqipëria, Lugina e Preshevës dhe Maqedonia e Veriut, së bashku me mësimdhënësit dhe përfaqësues të institucioneve arsimore.
Në emër të Ministrisë së Arsimit, para të pranishmëve ka folur zëvendësministri i Arsimit, Arsim Ademi, i cili falënderoi të gjithë pjesëmarrësit për kontributin dhe përkushtimin në promovimin e gjuhës dhe kulturës shqiptare. Ai theksoi rëndësinë që ka Abetarja si libri i parë që hap rrugën drejt dijes dhe si themel i ruajtjes së identitetit kombëtar.
“Gjuha shqipe ka mbijetuar nëpër shekuj përkundër sfidave të shumta, dhe sot ne e festojmë atë si simbol të unitetit tonë kombëtar,” u shpreh Ademi, duke përmendur edhe lansimin e Abetares së përbashkët Kosovë-Shqipëri në vitin 2022 si një rezultat i bashkëpunimit të suksesshëm ndërinstitucional në fushën e arsimit.
Ai i inkurajoi të rinjtë që të qëndrojnë pranë librit dhe dijes, dhe të kultivojnë dashurinë për gjuhën shqipe, si rrugë drejt formimit të qytetarëve të përgjegjshëm dhe të vetëdijshëm për trashëgiminë e tyre kulturore.
Fjalë rasti në këtë manifestim mbajtën edhe kryetari i Komunës së Prizrenit, Shaqir Totaj, përfaqësuesja e Ministrisë së Arsimit të Shqipërisë, Matilda Hoxha, si dhe përfaqësues nga Lugina e Preshevës dhe Maqedonia e Veriut, të cilët përgëzuan organizimin dhe rëndësinë e kësaj feste për ruajtjen e identitetit kombëtar përmes gjuhës dhe arsimit.
Me këtë rast, MAShTI ndau mirënjohje për 7 koordinatorët e shkollave nga Kosova, si dhe për shkollat pjesëmarrëse nga Shqipëria, Lugina e Preshevës dhe Maqedonia e Veriut, si shenjë mirënjohjeje për angazhimin dhe kontributin e tyre në realizimin e kësaj ngjarjeje të veçantë.
