Organizatorët e marshit pro-Palestinë në Londër të shtunën kanë thënë se në këtë marsh morën pjesë mbi 800 mijë persona.
“Jemi mbi 800 mijë vetë këtu sot dhe ky numër mund të arrijë edhe njëmilionëshin, duke e bërë këtë marshin e dytë më të madh në histori të Britanisë së Madhe”, është dëgjuar në zërin që vinte nga skena, shkruan “The Guardian”.
Policia metropolitane ndërkohë gjatë ditës ka thënë se po marshojnë rreth 300 mijë njerëz.
Policia po ashtu ka bërë të ditur se 105 persona janë arrestuar dhe shumica dërrmuese e tyre ishin në mesin e “antiprotestuesve”.
Në shumë vende të botës po protestohet për palestinezët, tash kur janë bërë një muaj e pak ditë që nga nisja e luftimeve në Lindjen e Mesme. Më 7 tetor, grupi militant Hamas sulmoi Izraelin duke vrarë mbi 1200 persona. Nga ajo ditë, Izraeli ka nisur ofensivë të ashpër ushtarake duke vrarë mbi 11 mijë persona, 40 për qind prej të cilëve fëmijë.
