Në një tendë u nënshkrua Marrëveshja Tekniko-Ushtarake që i dha fund luftës në Kosovë.
Arritjen e marrëveshjes, e komunikoi ushtaraku britanik Majkëll Xhekson që kishte negociuar me palën serbe për ditë të tëra deri në nënshkrim të marrëveshjes.
Dy dekada më pas, Jackson deklaroi në një bisedë për BBC se ishte i gëzuar dhe i lehtësuar meqë ishte arritur marrëveshja dhe lufta nuk vazhdonte më.
Por, për t’u nënshkruar marrëveshja e MTA-së, NATO kishte bombarduar 78 ditë caqet e ushtrisë serbe për ta detyruar Jugosllavinë e atëhershme që ta pranonte ndaljen e dhunës, masakrave e gjenocidit në Kosovë.
Ky moment historik u arrit pas një trysnie të madhe ndërkombëtare dhe diplomacisë intensive, duke shënuar fundin e një konflikti të përgjakshëm dhe hapjen e rrugës për ndërtimin e një të ardhmeje më të qëndrueshme dhe paqësore për Kosovën dhe rajonin.
Një diplomat amerikan James Pardju, në kujtimet e tij tregon se presionin politik të lidershipit amerikan që i kishte bërë Serbisë për t’i dhënë fund gjenocidit në Ballkan. Sipas tij, në fund të majit Millosheviçi kishte kërkuar një linjë të drejtpërdrejt me Uashingtonin për të diskutuar rreth ndaljes së bombardimeve të NATO-së. Pardju rrëfen se ndërthurja e diplomacisë së prerë dhe detyrimi ushtarak kryen punë.
Marrëveshja, e cila u arrit në Kumanovë të Maqedonisë së Veriut, përfshinte disa pika kyçe. Ndër më të rëndësishmet ishte tërheqja e plotë e forcave jugosllave nga Kosova, duke i hapur rrugë futjes së forcave ndërkombëtare paqeruajtëse të udhëhequra nga NATO, të njohura si KFOR.
Në bazë të marrëveshjes, forcat e KFOR-it nisën zhvendosjen në Kosovë më 12 qershor 1999, duke marrë nën kontroll situatën dhe duke siguruar kthimin e sigurt të refugjatëve dhe personave të zhvendosur në shtëpitë e tyre.
Gjithashtu, marrëveshja parashikonte çmilitarizimin e Ushtrisë Çlirimtare të Kosovës, UÇK-së, dhe transformimin e saj në një forcë civile, e cila më vonë u shndërrua në Forcë Mbrojtëse të Kosovës.
Pavarësisht përfundimit të konfliktit, sfidat mbetën të shumta. Kosova duhej të përballej me rindërtimin e vendit, pajtimin ndërmjet komuniteteve dhe ndërtimin e institucioneve demokratike.
