Në margjinat e panairit ndërkombëtar të mbrojtjes BEDEX 2026, ministri i Mbrojtjes i Kosovës, Ejup Maqedonci, ka zhvilluar një takim me ministrin e Mbrojtjes të Belgjika, Theo Francken, me të cilin kanë diskutuar për thellimin e bashkëpunimit ndërmjet dy vendeve në fushën e mbrojtjes dhe sigurisë.
Pas takimit, ministri Maqedonci bëri të ditur se bisedimet janë fokusuar në zhvillimin e industrisë së mbrojtjes dhe rritjen e bashkëpunimit ndërmjet forcave të armatosura të dy vendeve.
“Diskutuam për thellimin e bashkëpunimit ndërmjet Kosovës dhe Belgjikës në fushën e mbrojtjes dhe sigurisë, me fokus të veçantë në zhvillimin e industrisë së mbrojtjes, rritjen e bashkëpunimit ndërmjet ushtrive tona përmes trajnimeve të përbashkëta, si dhe mundësitë për shkëmbimin e oficerëve për shkollimin dhe avancimin profesional të tyre”, ka deklaruar Maqedonci.
Ai ka theksuar se një hap i rëndësishëm në këtë drejtim pritet të jetë edhe akreditimi i Atasheut të Mbrojtjes të Kosovës në Belgjikë.
“Një hap i rëndësishëm është edhe akreditimi i Atasheut të Mbrojtjes të Republikës së Kosovës në Belgjikë, i cili pritet të zyrtarizohet së shpejti dhe do të kontribuojë drejtpërdrejt në forcimin e bashkëpunimit tonë institucional dhe ushtarak”, ka shtuar ai.
Sipas ministrit Maqedonci, Kosova po vazhdon të ndërtojë partneritete të forta me aleatët ndërkombëtarë dhe të avancojë drejt forcimit të kapaciteteve të mbrojtjes dhe integrimit euroatlantik.
“Së bashku me aleatët tanë, për më shumë siguri, stabilitet dhe zhvillim”, ka përfunduar ai.
