Një 41-vjeçar nga fshati Lladrovc i komunës së Malishevës ka përfunduar në prangat e Policisë së Kosovës, pasi që i njëjti është gjetur duke kultivuar një sasi të madhe të bimëve narkotike të llojit Kanabis Sativa, raporton KosovaNews.
Mbrëmë pas mesnate, njësitet policore kanë kryer operacionin që erdhi pas hetimit me masa të fshehta, ku gjetën dhe sekuestruan afër 3 mijë bimë narkotike Kanabis Sativa me gjatësi 50 deri në 120 cm.
Në vendin e ngjarjes ata kanë vërejtur edhe personin e dyshuar, i cili kur ka parë Policinë kishte arritur që të ikë nga vendi i ngjarjes. Por ai ishte kapur nga patrulla policore e Malishevës pak më larg lokacionit ku po kryhej operacioni, duke përfunduar kështu në arrest.
Me urdhër të prokurorit është kryer bastisje edhe në shtëpinë e të dyshuarit dhe pronat tjera të tij, ku edhe në afërsi të shtëpisë së tij është gjetur sasi e bimëve narkotike të cilat po kultivoheshin nga 41-vjeçari.
Pas arrestimit, i dyshuari është shoqëruar në stacion policor për intevristim, ku ndaj tij është iniciuar rasti ‘Kultivim i bimës së hashashit, shkurres së kokainës ose bimëve të kanabisit’.
Pas përfundimit të procedurave policore, prokurori ka nxjerrë aktvendim që 41-vjeçarit t’i caktohet masa e ndalimit në kohëzgjatje prej 48 orësh.
Po ashtu, prokurori ka urdhëruar që bimët e sekuestruara të asgjësohen me anë të djegies, ndërkaq disa bimë janë marrë për ekzaminim.
