Presidenti i Francës, Emmanuel Macron, ka thënë se pret nga presidenti i Serbisë, Aleksandër Vuçiq, që të mbajë përgjegjësi dhe të dënojë aktet e sulmit të 24 shtatorit në Banjskë.
Në një konferencë të përbashkët me kryeministrin e Shqipërisë, Macron ka theksuar se ajo çka pret nga ana e Kosovës dhe Serbisë është mbajtja e zgjedhjeve në katër komunat veriore, pjesëmarrjen e serbëve të Kosovës në këto zgjedhje dhe njohjen e Asociacionit nga ana e Kosovës.
“Ne i ndjekim me vigjilencë tensionet që ekzistojnë në mes Kosovës dhe Serbisë. Franca dhe Gjermania kanë bërë një propozim udhërrëfyes që mendoj se është i fortë dhe i mirë dhe presim që të respektohet nga të dyja palët. Mendoj që është përgjegjësia e Vuçiqit që ta dënojë aktet e 24 shtatorit sepse kontribuon në rikthimin e qetësisë në kufi dhe më pas etapat e ardhshme dhe ajo çfarë presim nga autoritetet e Kosovës dhe Serbisë është e thjeshtë, riorganizimi i zgjedhjeve në komunat ku u bënë në kushte të papërshtatme, pjesëmarrjen e serbëve në këto zgjedhje dhe institucione, njohjen e Asociacionit te Komunave me shumicë serbe nga Kosova, sipas kësaj radhe plotësisht dhe totalisht dhe pres që Vuçiqi të jetë përgjegjës”.
Macron ka theksuar se çështja e liberalizimit të vizave, është pezulluar nga ana e Francës, sepse sipas tij, ka të bëjë me respektin e fjalës së dhënë dhe e njëjta Macron thotë se nuk po mbahet.
“E them me shumë qartësi që iu kemi besuar për çështjen e vizave, çështja është pezulluar nga ana e Francës sepse ka të bëjë me respektin e fjalës së dhënë dhe e njëjta nuk po mbahet. Pres që të angazhohen të dyja palët që të ecin përpara në javët e ardhshme, është kushti i paqes në të gjithë zonën”, tha ai.
