Konflikti me Iranin po përshkallëzohet, ndërsa sulme të reja kanë goditur kryeqytetin iranian, Teheranin, ndërkohë që shpërthime janë raportuar edhe në disa vende të Gjirit Persik.
Sipas cnn, një seri shpërthimesh të fuqishme janë dëgjuar të shtunën vonë në mbrëmje në Teheran, në kohën kur Izraeli njoftoi se kishte nisur një valë të re sulmesh ndaj objektivave në Iran.
Ndërkohë, shpërthime të reja janë raportuar edhe në disa pjesë të rajonit, përfshirë Bahreinin, Katarin dhe Emiratet e Bashkuara Arabe.
Në Dubai, banorët e disa ndërtesave të larta janë evakuuar pas shpërthimeve që tronditën zonën.
Në një tjetër zhvillim që sinjalizon përshkallëzim të konfliktit, presidenti i SHBA-së, Donald Trump, deklaroi se Irani “do të goditet shumë fort” gjatë këtij fundjave, duke lënë të kuptohet se sulmet mund të shtrihen edhe në zona të reja.
Nga ana tjetër, presidenti i Iranit kërkoi falje të shtunën për sulmet që prekën disa shtete fqinje të Gjirit. Megjithatë, Teherani ka paralajmëruar se do të vazhdojë sulmet hakmarrëse ndaj objektivave amerikane në Lindjen e Mesme.
Ndërkohë, presidenti amerikan Trump vizitoi të shtunën një bazë ajrore në Delaware, ku u zhvillua ceremonia për kthimin e trupave të gjashtë ushtarëve amerikanë të vrarë gjatë konfliktit.
Lufta po ndikon edhe në ekonomi. Çmimet e karburantit në SHBA kanë arritur nivelin mesatar më të lartë që nga gushti i vitit 2024, pjesërisht për shkak të sulmeve ndaj objekteve të naftës dhe mbylljes pothuajse të plotë të një rruge kyçe detare për transportin e energjisë.
