Stanislav Lobotka nuk ishte pjesë e ekipit të Napolit që mposhti Leccen 2:1 të shtunën në Serie A. Lobot ka luajtur ndeshjen e fundit në shkurt kundër Veronas.
Sllovaku humbi po ashtu ndeshjen e parë të marsit kundër Torinos për shkak të problemeve muskulore.
Mediumi sllovak “Sport24” ka paraqitur raportimet e mediumeve italiane në lidhje me lëndimin e yllit sllovak.
“Tuttonapoli” ka shkruar se Lobotka do të kthehet më 20 mars në ndeshjen që Napoli e luan ndaj Cagliarit.
Por mediumi “Calcio Napoli 24” ka shkruar se paraqitja e Lobotkas ndaj Kosovës më 26 mars në Bratislavë është në rrezik.
Sllovakia e Kosova përballen në gjysmëfinale të plejofit kualifikues për Kupën e Botës 2026.
“Ekziston rreziku që sllovaku të jetë jashtë lojës për një kohë të gjatë derisa problemi i tij me muskuj të zgjidhet përfundimisht. Dhe ky është një lajm shumë i keq për Calzonan, trajnerin e Sllovakisë, të cilit ndoshta do t’i duhet të luajë pa organizatorin e lojës, nëse ai nuk rikthehet në formë dhe nuk rikuperohet brenda shtatë ditësh”, ka shkruar “Calcio Napoli 24”.
Sllovakia shpreson edhe në rikthimin e kapitenit Milan Skriniar, i cili po ashtu po vuan nga një lëndim.
