Që nga 11 shtatori, Lituania nuk ka lejuar hyrjen e veturave me targa ruse, përveç atyre që kalojnë nga ose në rajonin e Kaliningradit.
Megjithatë, deri më tani nuk ka pasur raste të konfiskimit, ka thënë zëdhënësja e shërbimit doganor të Lituanisë, Irina Frolova-Milashene.
“Prej 11 shtatorit, doganat lituaneze nuk lejojnë që veturat me targa ruse të kalojnë kufirin, përveç nëse kalojnë tranzit përmes rajonit të Kaliningradit ose prej tij përmes Lituanisë. Megjithatë, nuk ka pasur raste të konfiskimit të veturave me licencë ruse”, thekson Frolova-Milashene.
Ajo thotë se të gjitha pikat kufitare kanë burime të mjaftueshme për të kontrolluar veturat me targa ruse.
Ministri i Punëve të Jashtme të Lituanisë, Gabrielus Landsbergis, ka thënë më herët se Vilniusi është duke u konsultuar me Komisionin Evropian për këtë çështje, sepse Lituania është në një situatë emergjente për shkak të kalimit përmes Kaliningradit dhe kujtoi se sipas rregullave, veturat në tranzit duhet të largohen nga territori i Lituanisë brenda 20 orëve.
Më herët, Komisioni Evropian konfirmoi se veturat e regjistruara në Rusi nuk mund të hyjnë në vendet e Bashkimit Evropian.
