Negociatat për paqe në Ukrainë janë të mundshme vetëm nëse synojnë vendosjen e një “rendi të ri botëror” pa dominimin amerikan, tha ministri i jashtëm rus Sergei Lavrov gjatë një udhëtimi në Turqi të premten.
“Ajo që duhet të diskutohet është se në çfarë do të bazohen parimet e rendit të ri botëror, për të cilin ne të gjithë kemi nevojë.”, tha ai.
Lavrov shtoi se në vend të një rendi botëror të njëanshëm, “Rusia së bashku me shumicën dërrmuese të shteteve të tjera po avokon që rendi i ri botëror të bazohet në parimet e Kartës së OKB-së, të cilat, e theksoj edhe një herë, janë shkelur drejtpërdrejt nga Perëndimi kolektiv”.
Lavrov vizitoi Ankaranë për tw biseduar me homologun e tij turk Mevlüt Çavuşoğlu rreth marrëveshjes së grurit të korrikut 2022 që lejoi zhbllokimin e pjesshëm të porteve dhe eksportimin e produkteve bujqësore nga Ukraina nëpërmjet Detit të Zi.
Moska fajëson vendet evropiane për injorimin e një pjese të marrëveshjes për eksportet ruse të grurit. Lavrov thotë se nevoja për këtë marrëveshje mund të rivlerësohet nëse vendet perëndimore nuk i rishikojnë sanksionet e tyre ndaj eksporteve ruse.
Turqia, anëtare e NATO-s, po përpiqet të bindë Rusinë dhe Ukrainën që të rifillojnë bisedimet e paqes, duke shpresuar të bazohen në përpjekjet diplomatike të bëra vitin e kaluar.
“Megjithë ndërlikimin e situatës ndërkombëtare, dialogu politik ruso-turk, kryesisht në nivel të krerëve të dy shteteve, vazhdon”, thuhet në deklaratën e Ministrisë së Jashtme ruse të lëshuar para fillimit të vizitës së Lavrov.
Ministria e Jashtme ruse tha se ishte dakord të zgjaste marrëveshjen e grurit “si një gjest i vullnetit të mirë për 60 ditë të tjera”.
Turqia ka kërkuar një shtyrje prej 120 ditësh, në përputhje me marrëveshjen fillestare. Ukraina është një nga prodhuesit kryesorë të grurit në botë.
Marrëveshja e negociuar nga Ankaraja dhe Kombet e Bashkuara në korrik 2022 ka lejuar deri më tani eksportin e më shumë se 25 milionë tonë drithë.
Diplomacia midis Turqisë dhe Rusisë mbetet e qëndrueshme. Presidenti rus Vladimir Putin dhe homologu i tij turk Rexhep Tajip Erdogan mbajnë raporte të ngushta, qoftë me telefon ose në takime kokë më kokë.
