Emisari i Bashkimit Evropian për dialogun Kosovë-Serbi, Miroslav Lajçak, pritet të vijë sot në Kosovë.
Ardhjen e Lajçakut në Kosovë e ka konfirmuar më parë edhe kryediplomati i Bashkimit Evropian, Josep Borrell, i cili tha se më 14 dhjetor Lajçak do të vizitojë Prishtinën dhe Beogradin për të ndihmuar në uljen e tensioneve në veri të Kosovës.
Por siç njoftohet i dërguari i BE-së për dialogun Kosovë – Serbi, Mirosllav Lajçak vjen sot në Prishtinë dhe do të ketë pasdite një takim me kryeministrin Albin Kurti, për të diskutuar për gjendjen në veri, planin evropian për marrëveshjen mes dy shteteve dhe për datën e mundshme për takimin e ardhshëm në mes krerëve të shteteve në Bruksel.
“Kryeministri i Republikës së Kosovës, Albin Kurti, pret në takim Përfaqësuesin e Posaçëm të Bashkimit Evropian për Dialogun Kosovë-Serbi, Miroslav Lajčák dhe Zëvendës Ndihmës Sekretarin e Shteteve të Bashkuara për Çështje Evropiane dhe Euroaziatike dhe njëherësh të dërguarin e posaçëm të Shteteve të Bashkuara të Amerikës për Ballkanin Perëndimor, Gabriel Escobar. Mediat mund të marrin pamje në oborrin e ndërtesës së Qeverisë”, thuhet në njoftimin e Kryeministrisë.
Lajçaku ka qëndruar në Kosovë edhe javën e shkuar, për të sjellë atë që po cilësohet version i ri i planit “evropian” për marrëveshjen Kosovë-Serbi.
Që nga 6 dhjetori, në veri të Kosovës janë shënuar një sërë incidentesh të armatosura, që kanë kulmuar me vendosjen e barrikadave pasditen e 10 dhjetorit.
Disa serbë lokalë nën nxitjen e Beogradit zyrtar nisën ngritjen e barrikadave në veri në shenjë pakënaqësie ndaj arrestimit të një ish-pjesëtari të Policisë së Kosovës.
Autoritetet në Kosovë thanë se ish-polici, Dejan Pantiq, dyshohet se ka organizuar “sulmin terrorist” ndaj zyrave të KQZ-së në veri.
Ndaj tij u caktua një muaj paraburgim më 12 dhjetor.
Komuniteti ndërkombëtar ka kërkuar që të largohen barrikadat dhe i ka dënuar sulmet ndaj Policisë së Kosovës dhe misionit të BE-së në Kosovë për sundim të ligjit, EULEX.
