I dërguari i special i Bashkimit Evropian për dialogun Kosovë-Serbi, Miroslav Lajçak, tha se të martën ka biseduar në Beograd me presidentin Aleksandar Vuçiq për hapat e ardhshëm në dialog. Ai ka shkruar në rrjetin social X të martën se ka biseduar edhe për zbatimin e Marrëveshjes bazë, në rrugën drejt normalizimit.
“Pas vizitës sime në Kosovë, udhëtova edhe në Beograd për t’u përgatitur për takimin e kësaj jave mes kryenegociatorëve… Diskutova për rrugën para në dialog dhe nevojën e hapave të radhës për implementimin e Marrëveshjes, në rrugën për normalizim”, ka shkruar ai.
Presidenti i Serbisë, Aleksandar Vuçiq, ka thënë se “Serbia është gjithmonë e gatshme për dialog” dhe “për të respektuar gjithçka që është nënshkruar dhe është rënë dakord”, në një takim që ka pasur me emisarin Miroslav Lajçak.
Deklarata e Vuçiqit bie ndesh me qëndrimet e tij të para pak ditëve e javëve se Serbia nuk e pranon Kosovën dhe nuk lejon pranimin e saj në Organizatën e Kombeve të Bashkuara, edhe pse njohja de-facto iu kërkua nga liderët evropianë e se në Marrëveshjen bazë Serbia pajtohet të mos pengojë rrugën e Kosovës në pranimin ndërkombëtar.
