Miroslav Lajçak do të mbetet në pozitën e Përfaqësuesit Special të BE-së për dialogun ndërmjet Kosovës dhe Serbisë, u tha gazetarëve në Bruksel një diplomat nga Shërbimi i Jashtëm që është i njohur me procesin.
“Miroslav Lajçakut i skadon mandati më 31 gusht, por Josep Borrell ka vendosur t’ia zgjasë atë për disa muaj”, tha ai.
Siç raportojnë mediat serbe, zyrtari i BE-së ka thënë se Borrell vendosi të ndërmarrë një hap të tillë sepse beson se Përfaqësuesi i ri i lartë i Bashkimit Evropian për politikë të jashtme dhe siguri, duhet të jetë ai që do të emërojë Përfaqësuesin e tij special për dialogun.
Megjithatë, nuk dihet se sa do të qëndrojë Lajçak në atë pozitë.
“Lajçak do të qëndrojë në atë pozicion për aq kohë sa të jetë e nevojshme, për të siguruar që procesi të mos mbetet pa ndërmjetës”, tha diplomati i BE-së.
Përfaqësuesi i ri i lartë i Bashkimit Evropian për politikë të jashtme dhe siguri, zgjidhet nga Parlamenti Evropian në kuadër të zgjedhjeve të Komisionit të BE-së, bazuar në propozimin e Këshillit Evropian. Zgjedhja e Komisionerit është planifikuar për në vjeshtë, por mund të përshpejtohet nëse marrëveshjet politike arrihen më herët.
Përfaqësuesi i BE-së më pas emëron përfaqësuesit e tij specialë, përfshirë edhe atë që do të merret me dialogun ndërmjet Kosovës dhe Serbisë.
Ndryshe, kryeministri i Kosovës, Albin Kurti dhe presidenti i Serbisë, Aleksandar Vuçiç, do të takohen më 26 qershor.
Lajmi është konfirmuar nga zëdhënësi i Bashkimit Evropian, Peter Stano, të enjten, i cili ka thënë se dialogu do të ndërmjetësohet nga përfaqësuesi i lartë i bllokut për politikë të jashtme dhe siguri, Josep Borrell.
Që nga shtatori s’ka pasur takim mes Kurtit dhe Vuçiç-it ndërsa për mbajtjen e rundit të ri të dialogut është rënë dakord gjatë vizitave që Lajçaku zhvilloi në Kosovë të martën dhe në Serbi të mërkurën.
