Një rast i dyshimtë vdekjeje është regjistruar në Prizren, ku një person është gjetur pa shenja jete në një lokal të marrë me qira në rrugën “Edit Durham”.
Viktima është identifikuar si Ahmet Ejupi, me nënshtetësi të dyfishtë të Republikës së Kosovës dhe Republikës së Shqipërisë.
Sipas të dhënave të para, një dëshmitar ka deklaruar se më 07 dhjetor, rreth orës 16:00, kishte hyrë në lokal dhe e kishte gjetur viktimën pa shenja jete. Ai nuk e kishte njoftuar Policinë e Kosovës, por vetëm familjen e viktimës që jeton në Durrës, dhe më pas kishte vazhduar udhëtimin drejt aeroportit. Rasti është raportuar në polici të nesërmen, rreth orës 08:30.
Policia ka dalë menjëherë në vendngjarje bashkë me ekipet emergjente dhe hetuesit rajonalë, ndërsa mjekët kanë konstatuar vdekjen në vend. Me autorizim të Prokurorit të Shtetit, trupi është dërguar në Institutin e Mjekësisë Ligjore për autopsi.
Rreth orës 11:00, IML ka tërhequr trupin e pajetë, ndërsa njësitë policore janë larguar pas përfundimit të ekzaminimeve fillestare.
Rasti tani po hetohet nga Sektori Rajonal i Hetimeve. Pritet raporti i autopsisë për të sqaruar shkaqet e vdekjes. Hetimet vazhdojnë.
