Deputeti i Lidhjes Demokratike të Kosovës (LDK), Krenar Xhaferi, ka deklaruar se seanca e sotme e Kuvendit është jashtëzakonisht e rëndësishme, pasi është e para pas aktgjykimit të Gjykatës Kushtetuese.
Ai kritikoi Lëvizjen Vetëvendosje dhe liderin e saj Albin Kurti, duke thënë se paaftësia për të zgjidhur ngërçin në Kuvend është sinjal i paaftësisë për të qeverisur vendin.
“Nëse fituesi i zgjedhjeve nuk është në gjendje të zgjidhë një ngërç parlamentar, nuk është në gjendje të qeverisë as me vendin. Kjo nuk bëhet pa marrëveshje politike. E marrëveshja bëhet me pjekuri politike”, tha Xhaferi në një prononcim për mediat.
Deputeti i LDK-së theksoi gjithashtu nevojën që presidentja e vendit të përfshihet më shumë në tejkalimin e krizës politike.
“Nuk është obligim që presidentja të vijë çdo 48 orë në seancë, siç pretendon Kurti. Obligim është marrëveshja politike për të dalë nga kjo situatë”, shtoi ai.
