Dardan Vuniqi, profesor në Fakultetin Juridik në Universitetin e Prizrenit “Ukshin Hoti”, të mërkurën (dje) është zgjedhur nga Kuvendi i Kosovës, anëtar i Këshillit Prokurorial të Kosovës (KPK), nga radhët e fakulteteve juridike.
Në votim morën pjesë 90 deputetë, ku prej tyre kandidati Vuniqi mori 49 vota, ndërsa kandidatja tjetër, Emine Abdyli – Pozhari nga Universiteti i Prishtinës “Hasan Prishtina” arriti t’i marrë 36 vota, kurse pesë vota u shpallën të pavlefshme.
Por kush është në fakt Dardan Vuniqi?
Megjithëse i ri në moshë (1988) Vuniqi kishte depërtuar lehtë për tu punësuar në instotucionet publike kjo falë lidhjes së tij me PDK-në. Në bazë të biografisë së publikuar Vuniqi ka punuar në Universitetin e Pejës dhe Gjilanit si mësimdhënës asistent ndërsa nga viti 2021 si profesor në Universitetin e Prizrenit ku edhe punon aktualisht.
Është pikërisht Universiteti i Prizrenit i cili ia ka propozuar Kuvendit të Kosovës për ta votuar për anëtar joprokuror të Këshillit Prokurorial të Kosovës (KPK), nga radhët e fakulteteve juridike.
Kuadri universitar Dardan Vuniqi në zgjedhjet e vitit 2019 prezantohet si e ardhme politike e PDK-së me “Dekaden e Re”
Në zgjedhjet e brendshme të PDK-së në vitin 2019 Dardan Vuniqi ishte prezantuar si kuadër universitar duke u zgjedhur krytar i nëndegës së PDK-së në fshatin Blinaj të Lipjanit
“Rrugëtimi edukativ na flet se z.Vuniqi është kuadër politik që i duhet sot Partisë Demokratike. “Dekada e Re” është vetë Dardani. Ai edhe pse i ri në moshë, del të jetë një vlerë e çmuar për subjektin politik së cilit i takon” thuhej ndër të tjera në njoftimin e degës së PDK-së në Lipjan njoftim i cili çuditërisht është fshirë nga faqja e internetit por që megjithatë është ruajtur si link edhe pse nuk hapet tashmë.
Anëtari i ri i Këshillit Prokurorial të Kosovës si duket është kujdesur paraprakisht që të mos lerë gjurmë në internet duke i fshehur lidhjet e tij me PDK-në, është vetëm një prortal që ende figuron si lajm aderimi i tij në PDK.
KosovaNews i ka siguruar disa fotografi të tubimeve zgjedhore në të cilat duket qartë që pjesë e fushatës ka qenë edhe Dardan Vuniqi si kryetar i nëndegës së Lipjanit.Kosova News e ka kontaktuar z.Vuniqi për ta pyetur se a është ende anëtarë i Partisë Demokratike të Kosovës por ai e ka mohuar një gjë të tillë duke thënë se ai është zgjedhur kryetar i nëndegës në mars 2019 por që këtë funksion e ka mbajtur për pak javë pasiqë i është përkushtuar profesionit dhe familjes.
“Po unë kam qenë për një kohë të shkurtë në PDK deri nga muaji maj 2019 por më pastaj i kam përfunduar aktivitetet e mia politike dhe ju kam përkushtuar profesionit dhe tani jam qytetar i thjesht” ka thënë ndër të tjera Dardan Vuniqi.
Por sipas dëshmive të siguruara nga KosovaNews Dardan Vuniqi nuk e thotë të vërtetën pasiqë ai me datë 10 shkurt 2020 shihet në fotografi të një tubimi të degës së PDK-së në Lipjan i përfaqësuar si kryetar i nëndegës së Blinajës.
Është e habitshme se si megjithë të kaluaren politike të Dardan Vuniqit ai arriti që përveç votave të bashkuara të opozitës të marrë edhe votat e një pjese të mazhorancës, pra të Grupit Parlamentar të Lëvizjes Vetëvendosje.
Nga 90 deputetë sa morën pjesë në votim shumica e deputetëve prezent në sallë ishin nga pozita por megjithatë dukshëm më shumë vota mori kandidati i preferuar i opozitës z.Dardan Vuniqi me gjithsejt 49 ndërsa konkurentja tjetër Emine Abdyli – Pozhari mori 36 vota që parimisht e kishte mbështetjen e grupit parlamentar të Lëvizjes Vetëvendosje.
Sipas burimeve të KosovaNews ky votim ka shkaktuar polemika dhe debate brenda grupit parlamentar të lëvizjes Vetëvendosje ku thuhet se janë rreth 20 deputet të mazhorancës e nga këta të pakten 10 nga grupi parlamentar i Vetëvendisjes të cilët votuan kandidatin e preferuar të opozitës z.Dardan Vuniqi edhe pse fillimisht ishte rënë dakord brenda grupit që të votohet znj.Emine Abdyli – Pozhari.
Lëvizja Vetëvendosje vazhdimisht akuzon opozitën dhe sidomos PDK-në për ndikime në këshillin gjyqësor dhe prokurorial në përzgjedhjen e gjyqtarëve dhe prokurorëve mirëpo ajo nuk po arrin që të paktën ku ka ndikim me votë të zgjedhë njerëz që janë jashtë politikës megjithëse e ka shumicën në Kuvend.
