Kuvendi i Shqipërisë pritet të mbajë sot seancë të posaçme për sulmin e ndodhur më 24 shtator në veri të Kosovës, prej të cilit mbeti i vrarë polici Afrim Bunjaku, i sulmuar nga një grup terrorist serbësh.
Seanca planifikohet të zgjasë pesë orë dhe pritet të miratohet një rezolutë për dënimin e sulmit terrorist serb në veri të Kosovës.
Ndërkohë mësohet se është arritur dakordësia mes Partisë Socialiste dhe opozitës për një projekt-rezolutë të përbashkët.
Ne media ka dalë edhe drafti i plotë me tre pika ku mbështetet rezoluta e Kuvendit të Kosovës.
Rezoluta e Kuvendit të Shqipërisë mbështet plotësisht dhe njëzëri Rezolutën Nr. 08-R-009 të Kuvendit të Republikës së Kosovës, miratuar në seancën e tij plenare të datës 28 shtator 2023.
Rezoluta gjithashtu kërkon nga institucionet kushtetuese të Republikës së Shqipërisë, që në të gjitha instancat ndërkombëtare sikurse dhe në kontaktet bilaterale me partnerët tanë të angazhohen fuqimisht dhe të ndërmarrin të gjitha veprimet e nevojshme për mundësimin e një hetimi ndërkombëtar lidhur me aktin terrorist në veri të Kosovës.
Në pikën e tretë rezoluta inkurajon qeverinë e Republikës së Kosovës që të punojë krah për krah dhe të bashkohet pa rezerva me aleatët e saj strategjikë, Bashkimin Evropian dhe Shtetet e Bashkuara të Amerikës, në funksion të procesit për arritjen e një marrëveshje përfundimtare për normalizimin e marrëdhënieve midis Kosovës dhe Serbisë dhe njohjen përfundimtare të Kosovës prej saj.
Seanca plenare e sotme do t’i dedikohet plotësisht Kosovës. Kjo seancë e posaçme është rezervuar për diskutime lidhur me ngjarjen e 24 shtatorit në Banjskë të Zveçanit, ndërsa pritet që ligjvënësit shqiptarë të votojnë një rezolutë e cila dënon sulmin e serbëve ndaj policisë së Kosovës.
Agjenda parashikon zhvillimin e një mocioni me debat për këtë çështje, ndërsa i pranishëm do të jetë vetëm kryeministri Edi Rama dhe ministri i jashtëm Igli Hasani që do të shpjegojnë qëndrime e mbajtura nga Tirana zyrtare deri më tani.
