Shefja e grupit parlamentar të Vetëvendosjes, Mimoza Kusari-Lila ka mbajtur fjalim në tubimin elektoral për gratë dhe vajzat, ku ka thënë se rrugëtimi i grave nuk është që fillon dhe mbaron me një mandat qeverisë, mirëpo sipas Kusarit-Lilës ai është mision që duhet të përqafohet nga e gjithë shoqëria.
“Rrugëtimi për vajzat dhe gratë e barabarta në shoqëri nuk është rrugëtim që nis dhe mbaron me një mandat qeverisës. Ajo është një rrugëtim i cili më shumë është mision dhe ai mision duhet të përqafohet nga e gjithë shoqëria, nga burrat dhe gratë nga djemtë dhe vajzat dhe nga të gjithë ata që e duan shoqërinë më të mirë për të gjithë”, ka thënë ajo.
Kusari-Lila, ka thënë se pengesa kryesore për përfshirjen e grave në politikë është pasiguria dhe brutaliteti i shfaqur ndaj tyre dhe se sipas saj gratë në politikë kanë dhënë shembull se barazia është parim elementar.
“Vlerësohet se pengesa kryesore për përfshirjen e grave në politikë është pasiguria dhe brutalitëti i shfaqur ndaj tyre, fatmirësisht kjo nuk është rasti as me listën tonë as me LVV-në. Nga përfshirja masive e grave dhe vajzave në forumet politike, tek përzgjedhja e numërit të madh të kandidateve për deputete, tek përfaqësimi në ekzekutiv dhe udhëheqje të komisioneve parlamentare kemi dhënë shembullin se barazia është parim elementar. Nuk është për statistikë dhe nuk është për numër”, ka thënë Kusari-Lila në tubimin elektoral për gratë dhe vajzat.
